Логойск - региональный интернет-портал

3 верасня 2010 г. каталіцкая супольнасць у Радашковічах (Мінска-Магілёўская архідыяцэзія) адзначала 150-годдзе сваёй святыні. У гэты ж дзень вернікі атрымалі сакрамэнт канфірмацыі з рук дапаможнага біскупа Мінска-Магілёўскай архідыяцэзіі Антонія Дзям’янкі. На парафіяльную ўрачыстасць завітаў таксама Мітрапаліт Мінска-Магілёўскі арцыбіскуп Тадэвуш Кандрусевіч.

Мітрапаліт, ненадоўга далучыўшыся да парафіяльнай супольнасці ў гэтае свята, звярнуўся да прысутных з прывітальным словам. Іерарх нагадаў гісторыю радашковіцкай святыні — багатую і поўную выпрабаванняў. «Сёння, адзначаючы юбілей 150-годдзя радашковіцкага касцёла, мы ўспамінаем яго багатую і адначасова трагічную гісторыю. Пабудаваны паўтара стагоддзі таму, ён стаў месцам спаткання чалавека з Богам. Тут атрымалі сакрамэнт хросту вашы дзяды і прадзеды. Тут святар благаславіў іх сужэнствы. Тут яны духоўна аднаўляліся ў сакрамэнце пакаяння. Тут карміліся хлебам жыцця вечнага — Эўхарыстыяй. Адсюль пасля заканчэння зямнога жыцця накіроўваліся ў месца вечнага спачынку», — адзначыў Мітрапаліт.

Узгадваючы першую святую Імшу на другім паверсе касцёла пасля яго вяртання вернікам, арцыпастыр адзначыў: «Гісторыя гэтага касцёла, як і гісторыя многіх іншых святынь на нашай зямлі, яшчэ раз паказвае, што Хрыстус сапраўды ёсць яе Валадаром».

Як вядома, менавіта ў гэтым касцёле быў пасвечаны ў таінства хрышчэння пясняр Беларусі -- Янка Купала.

http://catholic.by/2/home/news/belarus/minsk-mohilev/106046-radaszkowiczy.html