Логойск - региональный интернет-портал

Пачалася трэцяя, а наперадзе і чацвёртая змена аздараўлення дзяцей. За дзве папярэднія ўсяго аздаравіліся 1535 чалавек: 1050 вучняў школ адпачывалі на пляцоўках і ў лагерах з дзённым знаходжаннем, 485 — з кругласутачным.

Сёлета гасцінна прымалі школьнікаў стацыянарныя лагеры «Галактыка» Валожынскага, «Чайка» Чэрвеньскага, «Хваля» Смалявіцкага і «Гарызонт» Маладзечанскага раёнаў. У апошніх двух нашы дзеці будуць адпачываць да канца жніўня.

Як сведчыць аналіз мінулагодніх кампаній па арганізацыі дзіцячага адпачынку і папярэднія вынікі сёлетняй, іх аздараўленчы эфект дасягае 97,2 %. І гэта перш за ўсё абумоўлена правільным рэжымам сну, збалансаваным харчаваннем, свежым паветрам, заняткамі спортам і фізвыхаваннем. Да таго ж, на летніх пляцоўках з рознымі накірункамі пры дапамозе выхавальнікаў усебакова развіваецца асоба дзіцяці, раскрываюцца яго здольнасці, рэалізуюцца інтарэсы, прапагандуецца здаровы лад жыцця.

Па словах галоўнага спецыяліста Мінскага абласнога ўпраўлення па аздараўленні Юліі Рыбаковай, прадстаўніцтвам Мінскага абласнога ўпраўлення Рэспубліканскага цэнтра па аздараўленні і санаторна-курортным лячэнні насельніцтва на адпачынак дзяцей у лагерах усіх тыпаў быў выдаткаваны 151 млн. 850 тыс. рублёў, Лагойскім райвыканкамам — 8 млн. 14 тыс. руб. Акрамя таго, бясплатнымі пуцёўкамі былі забяспечаны 4 дзяцей-інвалідаў і 26 дзяцей-сірот.