Логойск - региональный интернет-портал

У Маскве ў рамках дзён славянскага пісьменства і культуры, прысвечаных Кірылу і Мяфодзію, з 15 па 27 мая праходзіў VІ міжнародны фестываль славянскай музыкі. Падчас фестывалю кожны раз адбываецца творчы абмен з адной са славянскіх краін, і ў 2010 г. ёй стала Беларусь (у мінулым годзе была Балгарыя).

Мерапрыемства праходзіла ў дзіцячай школе мастацтва ім. М. А. Балакірава, а яго закрыццё — у саборнай зале храма Хрыста-Збавіцеля. Удзельнікі фестывалю — прадстаўнікі многіх славянскіх народаў — выступалі ў розных праектах: конкурсе маладых выканаўцаў эстраднай песні «Майскі жук» (доўгі час яго ўзначальвала В. Талкунова), конкурсах маладых выканаўцаў харэаграфічнага мастацтва і фальклорных калектываў.

Конкурс маладых музыкантаў праводзіўся па розных намінацыях: скрыпка, народныя і духавыя інструменты, фартэпіяна. У апошняй намінацыі выступала вучаніца Таццяны Бандарэнка з Лагойскай школы мастацтваў Ганна Бабак, якая годна прадставіла сваю школу і родны горад. Талент нашай зямлячкі быў высока ацэнены аўтарытэтным журы, у склад якога ўваходзілі дзеячы мастацтва з розных краін, і яна атрымала дыплом лаўрэата ІІ ступені.

Удзел таленавітай музыканткі ў такім прэстыжным конкурсе стаў магчымым дзякуючы яе бацькам, якія ва ўсім падтрымліваюць адораную дачку.